7.-9. apríl 2017 var NSSK fundur í Reykjavík.
NSSK stendur fyri Nordiske SygeplejeStudenters Kontaktforum og er ”dótturfelagið” hjá SSN, Sygeplejeskenes Samarbejde i Norden.
Føroysku umboðini greiða soleiðis frá:
Daniella Joensen og Jórun Maria Dalbø umboðaðu Føroyar. Umframt okkum báðar vóru 2 umboð úr Danmørk, 2 úr Norra, 2 úr Íslandi, 1 úr Svøríki og 1 úr Finnlandi.
Fundurin byrjaði við at ymsu londini fingu møguleika at leggja fram trý evni, ið eru relevant fyri sjúkrarøktarfrøðiútbúgvingina júst nú. Her fingu vit beinanvegin eina fatan av, at londini hava felags trupulleikar. Serliga var løn og manglandi introduktión á arbeiðsplássi eftir loknan lesnað eitt afturvendandi evni millum londini.
Vit fingu sera nógv burturúr fundinum við m.a. fyrilestrum, workshop, kjaki og aktivitetum. Millum annað vóru vit til ein fyrilestur um ”Men in Nursing”, ið vit síðani kjakaðust um. Eitt sera áhugavert kjak, ið eisini varð tikið upp, var um ”Transfer from Nurse to Student”.
Vit sótu ikki bert og fundaðust. Íslendingarnir høvdu skipað fyri aktivitetum til okkum øll; vit hugnaðu okkum og svumu í Laugardalslaug, vitjaðu The Icelantic Phallological Museum (penis museum) og ótu 9 lekkrar rættir á Fiskamarkaðurinn.
Vit komu heim aftur til Føroyar við nógvari nýggjari vitan og fatan um lesnaðin í norðurlondunum, og síggja fram til næsta NSSK fundin, ið verður hildin í Føroyum 29. september til 1. oktober.