– Vit síggja longu nú, at útbyggingin av landssjúkrahúsinum fer ikki at nøkta tørvin, sum verður í framtíðini.
Tað sigur Óluva í Gong, forkvinna í Felagnum Føroyskir Sjúkrarøktarfrøðingar.
Í Degi og Viku herfyri kom fram, at deildirnar vóru hoyrdar um tørv, men ynskini vóru ikki gingin á møti.
– Vit gjørdu vart við tørvin og fólk vístu á, hvar tørvurin var, segði Ingun Gaardbo, leiðandi sjúkrarøktarfrøðingur á medisinsku deild við Dag og Viku.
Eftir útbyggingin verða 42 seingjapláss, sum eru trý fleiri enn á gomlu deildini.
– Viðgerðamøguleikarnir blíva so nógv fleiri og fólk fara at krevja nýggjar viðgerðir. Tørvurin á seingjaplássum fer bara at vaksa, sigur Óluva í Gong.
Sjúkrarøktarfrøðingarnir hava gjørt vart við, at ætlanin at spara goymslurúm, fer at gera arbeiðsumstøðurnar munandi verri. Úrslitið verður, at útgerð av øllum handa slag, hjálpitól og annað fara at standa út á gongini til bága fyri bæði sjúklingar og starvsfólk.
Við Dag og Viku segði Johnny í Grótinum, sjúkrahússtjóri, at tá tilboðini koma inn í summar, fara tey at leggja upp fyri atfinningunum um, at ov fá goymslurúm er.
Óluva í Gong heldur, at fyri at tryggja góðar umstøður bæði hjá sjúklingum og starvsfólki, kann vera neyðugt at fara hægri enn til stjóran.
– Kanska er tað arbeiðseftirlitið ella landsstýriskvinnan sum skulu inn fyri at tryggja, at útbyggingin lýkur vanlig krøv til deildir á einum sjúkrahúsi, sigur Óluva í Gong.
Ætlanin er, at nýggi bygningurin skal hýsa medisinska deplinum, psykiatriska deplinum, føðideildini og fysioterapiini.
Útbyggingin verður liðug í 2019 og fer at kosta umleið 350 milliónir krónur.